مراحل الحب الخمسه في اي مرحله مها انت ؟

بعد 40 سنة من الأبحاث و الدراسات , بيوصل عالم النفس المشهور Jed Diamond لنظرية شبه عامة إن الحب مكون من 5 مراحل أساسية لكن أغلب الـ Couples بيوقفوا عند مرحلة رقم 3 ..
1- مرحلة الوقع في الحب :
جوا كل واحد فينا رغبة قوية أنه يلاقي حد يتبادل معاه مشاعر الحب و الإهتمام , فمن أول ما الإنسان يبدأ ينضج علي المستوي الجسدي و النفسي يبتدي يدور علي شريك لحياته .. في المرحلة ديه اللاوعي و الهرمونات بيبقوا هما المتحكمين الاساسين .. فزي ما مثلا طة حسين وقع في حب سوزان من صوتها أو رضوي عاشور وقعت في حب مريد البرغوثي لما لاقيته واقف في الجامعة بيقول شعر .. فهي مرحلة فيها الشخص بيبقي عامل زي اللي أخيرا لقي اللي بيدور عليه ! أيوه هو ده .. أيوه هي ديه ! فهو إعجاب , بس إعجاب عميق شوية .. يعني إعجاب اللي هو يدفعك انك تكون عاوز تبقي قريب من الشخص ده و يبقي حد مهم في حياتك

2- مرحلة الشركاء :
هنا بقي أنا من كل كياني عاوز أكمل مع الشخص ده بقية عمري .. مش هرمونات بقي و إعجاب , إنما حالة السعادة اللي الشخص ده بيخليك فيها بتصور لك خطط و أحلام عن مدي جمال مستقبلكوا مع بعض , المرحلة ديه بتكلموا بعض كتير و بتتفاعلوا مع بعض بشكل أقوي , كأنكوا عايشين مع بعض بالظبط .. زي الجعان اللي لقي أكل , العطشان في الصحرا اللي لقي ماية .. و اللي تعتبر أكتر مرحلة متوهجة في العلاقة العاطفية .. فاللي كان بعيد و مش لاقيه .. أخيرا بقي شريكك العاطفي الدائم ..

3- مرحلة إزالة الوهم :
.. هنا أنتوا قعدتوا مع بعض كتير و شوفتوا حاجة أبعد من مجرد لحظات إعجاب .. هنا طة حسين سمع أبعد من مجرد صوت سوزان الرقيق .. رضوي عاشور شافت مواقف و أفعال مختلفة لمريد البرغوثي .. فمهما كان الشخص اللي انتا اعجبت بيه ساحر و جذاب هو في النهاية إنسان .. الشاعر الرقيق ممكن يتعصب , الفنانة الجذابة عادي بتغلط .. كلنا لينا عيوبنا اللي بتعيش معانا في حياتنا الخاصة … و اللي ممكن تعتبر صدمة للي مكانوش يعرفونا قبل كدة و يكون قرارهم الهروب من الواقع المختلف ده .. او زي ما بيتقال “في مرحلة ما من حياتك‏ سوف تدرك إن بعض الأشخاص سيبقون في قلبك .. ولكن ليس في حياتك”

4- مرحلة الحب الحقيقي :
نجيب محفوظ بيقول “الذي يحب , يحب رغم العيوب بل يحب العيوب أيضاً” .. و ديه مرحلة حب العقل بقي , حب النضوج , فانا بعد ما شوفتك علي حقيقتك اللي ممكن تكون مش عجباني برضة قررت اختارك و أحبك ! بس السؤال هنا طب ما دام الشخص ده بعيوب و مفضلش بالصورة الخلابة اللي كان بيها , أتمسك بيه ليه ؟؟ .. الحب مش عامل زي سلعة حتنزل تشتريها فبتفاضل بين الأفضل و تجيبها .. فانتا بتستخدم السلعة لغرض ما مش بتحبها و تعمل معاها علاقة !! فانتا لما بتحب الشخص ده مش بتحبه عشان هو الأفضل , انما عشان لما بتبقي معاه بيوصلك لأفضل حالتك .. هو الوحيد اللي بيقدر يوصل لاعماق فكرك و روحك .. بيفهم سكوتك و بيحس بقلبك .. زي تناسق وجداني غير مرتب .. فاللي بتحبوهم بتكونوا مدركين تماما انهم مش افضل ناس في الكون بس عيون حبكم بتخليكوا شايفنهم كدة ..

5- مرحلة القوة المشتركة لتغيير العالم :
.. مرحلة ان الاتنين بقوا كيان واحد بفكر و هدف و روح واحدة , بيشجعوا بعض للأفضل .. هو دايما بيساعدها و ينظم لها حياتها , هي توقف معاه في أصعب لحظاته و تحارب معاه للنهاية ! زي لما صفية زغلول توقف مع سعد زغلول في القضية اللي هو مؤمن بيها و متعملش زي ستات كتير تهاجم او تقلل من عزيمة الرجالة اللي معاهم ,, كانت ببساطة ممكن تقوله سيبك من العك اللي بتعمله ده و ركز في شغلك و اكل عيشك ! لما عبلة الرويني تصدق موهبة أمل دنقل و تقرر تفضل معاه طول حياتها بالرغم من أنها بنت الأصول اللي مش متربية علي البهدلة انما هو شاعر فقير صعلوك ملوش مستقبل او طريق ! لما العالم بيار كوري يساعد مراته ماري كوري أنها تبقي من اعظم العلماء في القرن العشرين و يساعدها تحقق حلمها ميفكرش تفكير اناني متطرف و يقتل أحلامها و موهبتها … مش كتير بيوصلوا للمرحلة ديه , بس ديه اعظم مراحل الحب ..

في النهاية في جملة بتقول follow your heart but dont forget to take your brain with you too بمعني أتبع قلبك بس متنساش تاخد عقلك معاك .. ففكرة استقبال المشاعر و العواطف في قوالب مادية صلبة فكرة مشوهة و عقيمة .. و برضة فكرة الهيام الغير عقلاني الغير محسوب ابعاده او توابعه فكرة صبيانية ساذجة .. فحب من كل قلبك و بكل عقلك .. متبخلش في إحساس او تفاعل ، صدق اللي بتمر بيه و ادي له قيمته ، تعمق و عيش جوا حبيبك .. عيش لحظات فرحه و قلقه ، لحظات بريقه و ضعفه ، لحظات سحره و نمطتيه .. فعيش جواه قبل ما تفكر تعيش معاه ..

تعليق واحد على

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *